राष्ट्रिय युवा संघ नेपाल जिल्ला कमिटी, रसुवामा एकैदिन दुई पदाधिकारीले पद तथा पार्टी सदस्यता परित्याग गरेका छन्। सचिव सूर्यमान तामाङ र उपाध्यक्ष फुर्पा दिण्डुप थोक्रा (सुरेश)ले छुट्टाछुट्टै वक्तव्य जारी गर्दै संगठनभित्र देखिएको आन्तरिक असन्तुलन, दिशाहीनता र राजनीतिक अनिश्चितताप्रति असन्तुष्टि जनाउँदै जिम्मेवारी त्यागेको घोषणा गरेका हुन्।
बिज्ञापन
सचिव तामाङले २०८२ फागुन ६ गतेदेखि लागू हुने गरी जिल्ला कमिटी, रसुवाको सचिव पदबाट राजीनामा दिएको उल्लेख गरेका छन्। लामो समयदेखि सक्रिय रूपमा संगठनमा आबद्ध रहँदा पनि पछिल्लो समय देखिएको विचारधारात्मक असन्तुलन, आन्तरिक राजनीतिका गतिविधि र अनिश्चित राजनीतिक भविष्यका कारण पदमा बसिरहन उपयुक्त नदेखिएको उनले बताएका छन्। अबदेखि स्वतन्त्र नागरिकको रूपमा आफ्नो पहिचान कायम गर्ने जानकारीसमेत उनले दिएका छन्।
बिज्ञापन
त्यस्तै, उपाध्यक्ष थोक्राले पनि फागुन ६ गतेदेखि लागू हुने गरी संगठनको उपाध्यक्ष पद र पार्टी सदस्यता (नं. ६२५९६९) पूर्ण रूपमा परित्याग गरेको घोषणा गरेका छन्। संगठनभित्र देखिएको दिशाहीनता, जनभावनाप्रति बढ्दो बेवास्ता तथा मूल्य–मान्यताबाट विचलन भएको आरोप लगाउँदै उनले पद र पार्टी दुवै त्यागेको स्पष्ट पारेका छन्।
यस्तै सचिव सुर्यमान तमाङले लामो समयदेखि पार्टीमा सक्रिय हुँदा गर्दा संगठनभित्र देखिएको अनिश्चित राजनीतिक भविष्य र आन्तरिक गतिविधि र विचारात्मक असन्तुलनका कारण फागुनकै मितिदेखि लागू हुने गरि युवा संघ रसुवाको सचिव पदबाट राजीनामा दिएको जनाएकाछन् । तमाङले सचिव पदबाट राजीनामा दिनुका साथैं पार्टी सदस्यता समेत परित्याग गरेको घोषणा गरेका छन् ।
बिज्ञापन
फागुन २१ गते हुन गइरहेको निर्वाचनको पूर्वसन्ध्यामा दुई जिम्मेवार पदाधिकारीको एकैसाथ बहिर्गमनले जिल्ला संगठनमा राजनीतिक तरंग उत्पन्न गरेको छ। यस घटनाले स्थानीय तहको आन्तरिक समीकरण र आगामी निर्वाचन तयारीमा प्रभाव पार्ने आकलन गरिएको छ।
